O espectáculo preséntase como unha viaxe musical e emocional arredor da idea de “insolencia” entendida como actitude crítica, creativa e transformadora. A través dun formato multidisciplinar, o concerto combina interpretación musical, narración e interacción co público, convertendo a experiencia nun espazo de reflexión compartida.
O repertorio inclúe composicións propias xunto con cancións tradicionais e pezas emblemáticas da música de intervención social. Entre elas, destacan títulos como Grândola, Vila Morena, do cantautor portugués José Afonso —símbolo da Revolución dos Caraveis—, ou Txoria txori, de Mikel Laboa, unha das máis recoñecidas metáforas sobre a liberdade. O programa complétase con adaptacións de música tradicional portuguesa e galega, así como cancións vinculadas á memoria histórica e á loita pola liberdade de expresión.
A proposta sonora constrúese a partir dunha combinación de instrumentos acústicos —ukelele, guitarra, percusión tradicional galega— e recursos tecnolóxicos como pedais de loops, xerando unha paisaxe musical rica e contemporánea. Nesta ocasión, o concerto contará coa colaboración do músico Iago Prieto Castro, quen achegará novas texturas sonoras desde a frauta e a gaita.
